الصورة دي لقيتها في ميموريز عندي عالموبايل.
أول يوم ليا في الماجستير في مدينة زويل.
فيه ناس كتير متعرفش ان حلمي كان إني أدرس في مدينة زويل بكالوريوس من وأنا قي ثانوي.
مكنش حلمي لا طب ولا صيدلة ولا الكليات دي خالص.
لما جبت مجموعها، قدمت وسقطت في اختبار القدرات وطبعا اكتئبت بس قولت هجرب تاني.
كتبت كلية علوم رغبة اولي رغم ان مجموعي كان يجيب بيطري و أهلي كانوا بيقنعوني أدخل صيدلة خاص.
بس كنت شايفة ان حلمي أني أكمل ريسيرش هيتحقق من علوم، وإن الواحد هو اللي بيصنع مستقبله لنفسه مش الكلية.
دخلت سنة أولي كلية وجبت جيد 😂، كنت مخضوضة وعندي صدمة حضارية من الكلية معلش 😂.
قدمت في زويل تاني مرة وأنا في سنة أولي سقطت تاني 😂
فكملت في علوم، حاولت أتعلم أسلوب الإمتحانات، أخدت كورسات في بعض المواد، بقيت بذاكر مع أصحابي، بلصم بعض المواد.
كنت بتنطط في أي تدريب او مؤتمر موجود، عملت network كويسة و خبرة كويسة.
قابلت دكتور أيمن الشبيني الله يباركله وطلبت أنزل معاه تدريب ونزلت تدريب صيفي في سنة تالتة في المعمل عنده في زويل. الحمد لله أثبت نفسي و قلي معملي مفتوحلك في اي وقت.
ماما ماتت يوم امتحان العملي بتاع الترم التاني في سنة تالتة.. مش محتاجة أعلق هنا.
اتخرجت بإمتياز.
قعدت شهرين بعد التخرج مش عارفة أعمل ايه ولا اشتغل ايه.
نزلت معمل تحاليل يوم واحد، قولت الكار ده مش كاري.
بعديها اتواصلت تاني مع دكتور أيمن، نزلت تطوع ٦ شهور عنده.
بعديها، جتلي منحة ممولة بالكامل بالماجستير و مرتب كباحثة في المعمل لمدة سنتين.
وبقيت باحثة وطالبة ماجستير في مدينة زويل 🥺❤️
نشرت ١٢ بحث في فترة وجودي في المدينة، الحمد لله.
وها هنا، أحدثكم من بلاد الفرنجة وأنا في أخر سنة دكتوراه في ايرلندا ❤️
كل حاجة بتيجي في وقتها وبأفضل شكل، كله بترتيب ربنا.
وإن صدقت العزم، لوجدت السبيل ✨️
https://www.facebook.com/share/p/1C5kh9nqcN/
